സ്നേഹം

സ്നേഹം

സ്നേഹമെന്തെന്നറിയുന്ന നാമെല്ലാം

വിരഹമെന്നതുമറിയുന്നതുണ്ടല്ലോ.

വിരഹമെന്തെന്നറിയുമ്പോളൊ,ന്നുമേ

വേണ്ടായിരുന്നെന്നൊക്കെതോന്നുന്നു!

വിരഹത്തിന്നവസാനമീ സ്നേഹം

ശക്തിയായിത്തിരിച്ചെത്തുന്നതും കാണാം.

വീണ്ടുമകൽച്ചകൾ വരുമെന്നാകിലോ

കൊതിതീരെക്കണ്ടില്ലെന്നതും തോന്നും!

കൊതിയൊന്നും നല്ലതല്ലെന്നറിയുന്നു നാമെല്ലാം

അതനർത്ഥങ്ങളേറെ വന്നുകൂടുമെന്നതും.

സ്നേഹമാണഖില സാരമൂഴിയിലെന്നെല്ലാം

പാടി പണ്ടേ നമ്മൾതൻ മഹാകവി.

മാത്രമോ, സ്നേഹമമൃതമാണെന്നൊക്കെ-

യനുഭവിച്ചവര്‍ക്കെല്ലാമറിയാതിരിക്കുമോ?

അമിതമായാലമൃതും വിഷമാണെന്നൊരു

പഴഞ്ചൊല്ലു പണ്ടേ നിലവിലുണ്ടെന്നതും.

ആ അമൃതമമിതമാക്കാതെതന്നെ നാം

സ്നേഹമവനിയിലന്വർത്ഥമാക്കണം.